Nakuha ng District 3 ang kampeonato kontra District 4 sa Best of 3 championship series ng 2024 LGU-Bayambang Inter-District Basketball Tournament na ginanap sa Barangay Buenlag 1st Covered Court noong ika-4 ng Hunyo 2024.
Naging dikit ang laban simula pa lang ng unang quarter, kung saan tabla ang score, 24-24, sa pagtatapos nito. Nagpalitan naman ng lamang ang bawat koponan pagpasok ng 2nd quarter, kung saan sa halftime break ay lamang ng isang puntos ang District 3, 48-47.
Nagpatuloy ang bakbakan ng dalawang koponan mula 3rd at final quarter kung saan nanaig ang District 3 sa final score na 89-85 kontra District 4.
Noong June 2, nagwagi sa Game 1 ang District 3, 104-92. Bumawi naman sa Game 2 noong June 3 ang District 4 para itabla ang kanilang serye sa iskor na 85-74 para magkaroon ng do-or-die game 3.
Dumalo sa championship game sina Municipal Councilor Amory M. Junio at SK Federation President Marianne Cheska Dulay.
Ang 2024 LGU Bayambang Inter-District Basketball Tournament, na may temang “Engaging through Sports towards Unity, Sportsmanship, and Great Camaraderie,” ay inorganisa ng Municipal Physical Fitness and Sports Development Council sa pamumuno ni Mayor Niña Jose-Quiambao at MPFSDC Executive Director Bernardo Jimenez, kasama sina Sports Secretariat Dennis Aldrin Malicdem at mga Sports Committee members na sina Tito Mayo at Edward Dulay, sa tulong ni Municipal Administrator, Atty. Rodelynn Rajini Sagarino-Vidad, mga volunteer coach, ICTO, at Buenlag 1st PB Laureno R. Junio at Buenlag 1st Barangay Council. (ni Jayvee M. Baltazar/RSO; larawan: Jayvee M. Baltazar)
